Q8Ping
مقالات مشابهة
الشركة اللاسلكية للبيانات المتنقلة – Wimd – هي شركة انترنت جديدة في الكويت توفر الانترنت لزبائنها بطريقة (لا سلكية) دون الحاجه للأشتراك عن طريق الخطوط الارضيه للهواتف ولا الالياف الضوئية .. فكرة توصيل الانترنت في هذه الشركة عبارة عن تركيب جهاز استقطاب صغير في اعلى نقطه في منزلك وتوجيه الجهاز لأقرب برج للشركة او ابراج وزارة المواصلات .. يقوم هذا الجهاز بستقطاب اشارة إنترنت سرعتها ثابته خاصه لك وتوصيلها من خلال كيبل يمد من جهاز الاستقطاب إلي جهاز (راوتر) في وسط المنزل .
الفائدة الاولى من هذه الفكرة هي ان بعض الاشخاص (وانا منهم) يعانون من ضعف البنيه التحتيه للخطوط الارضيه فـ انا مثلا الخطوط الارضيه لمنزلي لا تستوعب سرعه اكبر من 2Mbps .. الامر الذي جعلني اقوم بتجربة اشتراكات اخرى مثل (شركات الاتصالات) و (شركة مدى) لكن للأسف هذه الشركات تعطي انترنت مشترك وغير ثابت .. وفي افضل الاحوال الانترنت لا يتعدى 7Mbps وهذا الرقم خيالي نوعاً بالنسبه لشركات الاتصالات وشركة مدى .. على عكس الانترنت في شركة Wimd فهو مثل (DSL) سرعته ثابته . وبدون أي لمت او حد معين للتحميل .
قامت الشركة بالأتصال بي وتحديد موعد لكي اقوم بتجربة الانترنت في منزلي بسرعة (15Mbps) وفعلاً بعد ايام وصلني مندوب الشركة في سيارة مجهزه بجميع معداتهم وعدد كافي جداً من العمال (5 عمال) لإنهاء المهمه بفترة زمنيه ممتازة (حوالي 40 دقيقة) .
في البداية يحتاجون لمشاهدة اعلى نقطه في المنزل فـ في حال عدم وجود برج ليثبتو عليه الجهاز يقومون بتركيب (بايب حديدي) متوفر لديهم .. اما بالنسبه لي فـ برج (الاريل) للتلفزيون الارضي القديم موجود منذ سنين .. قام بتثبيت الجهاز عليه وتوجيهه على برج سنترال وزارة المواصلات القريب من منزلي .. وفحص سرعه الانترنت من خلال جهاز لابتوب .. وبعد تثبيت الجهاز بشكل جيد وفحص سرعه الانترنت .. يقومون بتوصيل سلك (إثر نت) لجهاز الراوتر في وسط المنزل .
نوع جهاز الراوتر المستخدم هو (Linksys E1500 Wireless-N Router with SpeedBoost) ويعتبر مداه جيد ..
بعد التركيب واتمام العملية على اكمل وجه قمت بتجربة سرعة الانترنت من ناحيه الداونلود والابلود وتصفح موقع يوتيوب على سبيل المثال .. ولتوصيل المعلومة اسرع قمت بتصوير هذا الفيديو لي وانا اقوم بتجربة الانترنت وتصفح موقع اليوتيوب ومشاهدة مقاطع بجودة علية جداً (1018p) وتحميل بعض الملفات من الانترنت (علماً ان سرعة اشتراكي 15Mbps) .
httpv://www.youtube.com/watch?v=bFnUaAuTY7U
YouTube Link
بعد تجربة تصفح اليوتيوب والداونلود .. قمت بتجربة الأبلود من خلال رفع هذا المقطع على اليوتيوب بجودة 720p وحجمه (128 MB) استغرق رفع الملف حوالي ٧ دقائق فقط
الخلاصة:-
بعد تجربتي للخدمة فـ سرعة الانترنت ممتازة وتعتبر ثابته إلي حد ما .. وخدمه التركيب ممتازه ايضاً .. اما سعر الخدمة من وجهه نظري هو سعر عالي جداً مقارنة مع خدمات الانترنت في الكويت ويعتبر هو السعر الاعلى .. لكن لنكون صادقين لا يوجد بديل في الكويت لمن يرغب بالأشتراك في الانترنت بسرعات عاليه جداً وثابته ووجود مثل هذه الشركة كـ خيار لمن يحتاج هذه السرعة وبمقدوره دفع هذا المبلغ امر جميل .. علماً ان الشركة تقدم اشتراكات بسرعات اكثر مثل 20 و 25 و 30 ..
لمعلومات اكثر عن الشركة :-
موقعهم الإلكتروني : http://wimd.com.kw/
تليفون خدمة العملاء : 22475841/2
ويمكنكم الاستفسار من ايميل الشركة على تويتر : @Wimd_co
الصورة لأولى دمااااااااااااااااااااااااااااااار هاهاهااا
بعيدا عن التعليق بالصورة ….
هل الاكيد سرعتهم ثابتة!!؟ وشلون القيمز معاها.؟
للأمانه ماجربت القيمز .. وبالنسبه لثبات السرعه .. انا استخدمته حالياً حوالي يوم كامل .. ان شاء الله يستمر على هذا الحال بالثباات
بصراااااحه كفيت ووفيت بتقريرك هذا بس
جم اشتراك انت وبجم سعره الي خذيته انت
كاتب بالموضوع ان اشتراكي 15Mbps
870 دينار
مشكور ياعمده
بالنسبه لي ليس مهم المبلغ طالما الخدمه ممتازه بدون مشاكل
خاصه تجربتي مع شركة مدى للاسف اعتقد انها شركه متكونه من عصابه او حراميه بدون انجاز او اهتمام للعملاء
اشكرك اخي الكريم على طرح التجربة بالرغم من الاشتراك العالي هذا لايهم طالما هناك شي ايجابي بالخدمة وكل ما اتمناه منك اخي الكريم تزويدنا بالنتائج مع الوقت مع الايام مع اني اتوقع ستكون الافضل
بالتوفيق اخوي
هذا الاشتراك والا بلااااش 😀
هل في حدود للتحميل ؟
لا يوجد
والله غالي ونار يابوجاسم بس قلتها للي منحد والبنيه التحتيه عنده قديمه وايرات نحاسيه مو الياف ضوئيه ، بس عن نفسي انسى احط اقزرها على بو ٢ ميقا احسن لي :/
وهذا الواقع 2 ميقا تقريبا 110 دنانير ابرك من المجازفه بسنه كامله وخوفك يطلعون اخر شي نفس مدى لاتعامل ولا سرعه ونصب لابارك الله في مدى تعقدت منهم ههه
سرعته جدآ ممتازه ولكن ممكن اعرف الي انت مركبه على اي سرعه بالضبط؟
15Mbps
انا اشتراكي كواليتي نت كان حده 3 ميقا (بت) قبل .. بدلت الوايرات الداخليه من ال دي بي لي الراوتر حطيت نوع cat-6 السرعه طمرت من 3 ميقا (بت) لي 17 ميقابت، الوايرات من الوزاره قديمه بس اتوقع هذا حد الوايرات العاديه غير الفايبر اوبتك الي تعطيك لي 25 ميقا (بايت) اي دبل دبلات هذه السرعه، المهم اشتراكي جددته ب 380 دينار مع ان هو نفسه خذيته ب 208 قبل سنتين دبل السعر ونفس السرعه… مع كاب من الصبح لي الساعه 12 بليل …
المهم ان اسعار الشركة هذي حدها نار يعني سرعتي حالياً 11 ميقابت
http://www.speedtest.net/result/1816971003.png
عندهم ب 590 .. على اشتراك ويرلس.. وانبه اخواني ان اشتراكات الويرلس ماتنفع بتاتا للقيمز البنج راح يرتفع لي 300-400 او يمكن اكثر بعد بسيرفرات اوروبيه.. وحتى ماينفع لتصفح بسيرفرات امريكيه
ملاحظه:
الفرق بين ميقابت وميقا بايت
MB – Megabyte
Mb – Megabits & Mbps
مع مراعاة الفرق بين السمول لتر والكابيتل لتر..
الميقا(بايت) الواحد يعادل ٨ ميقا(بت)
وانا اشتراكي حالياً ١١ ميقابت يعادل ١.٣٧٥ ميقابايت
تحياتي وانشالله تستفيدون
صح كلامك انا مجرب نفس الطريقه في البحرين اذا صار مطر يفصل و علي ما اظن لعد اغبار يفصل بعد.
والله شي حلو بس لحد الان جديده وماتعرف لها
انا كلمتهم وبصراحه كان ودي اشترك بس ياخوي سالفه اني ادفع ٨٧٠ كاش مقدم ماعجبتني
لو تحسبها شهريا على سنه تطلع لك تقريبا ٧٢ دينار
ليش مايقسطون العالم علشان الكل يقدم يشترك بالسرعه اللي يبيها بدال مايوقف له المبلغ
انا راح اشترك وياهم بسرعه ١٥ اذا توافرت الاقساط واتمنى توافرها بصراحه لان ودي اجرب
السعر غالي لدرجه مو طبيعيه…..انا اقول حتى لو مدى تعبانين بس يكثرون الابراج شوي والسرعه تكون زينه و٢٠٠ دينار بالسنه مو مشكله اذا الشهر ب ٢٠
شكرا جزيلا، عساك عالقوه
بس سؤال .. مدته جم بيكون الاشتراك؟ ولا دائم؟
سنه
اخوي محمد ..
المنطقة الي انا فيها ما يتحمل سرعة اكثر من ٢ ميغا بت .. هل هذا يأثر على سرعة الي مشترك فيها !!
يعني اذا اشتركت بـ ٦ ميغا .. هل راح احصل على ٦ ميغا .. او ان السرعه ما راح تتجاوز ٢ ميغا !!
وتحياتي لك ..
هذا سعرها بالشهر ولا بالسنه
واذا كان هذا سعرها بالسنه كم ادفع شهري
وماشاء الله خووش اشتراك اندوره دواره ههههه
موفق حبيب قلبي
ويعطيك العافيه
السعر مبالغ فيه جدا
ﻣﺎﻳﻨﺪﺭﺍ ﻋﻨﻬﻢ ﺍﻟﺸﺮﻛﺔ ﺗﻮﻫﺎ ﻳﺪﻳﺪﺓ ﻭﻟﺤﺪ ﺍﻟﺤﻴﻦ ﻣﺎﻋﻠﻴﻬﻢ ﺿﻐﻂ،، ﺧﻞ ﻳﺸﺘﺮﻛﻮﻥ ﻧﺎﺱ ﻣﻌﺎﻫﻢ ﻭﻳﺒﻴﻦ ﻋﺎﺩ ﻭﻗﺘﻬﺎ.. ﺑﺲ ﺃﺳﻌﺎﺭﻫﻢ ﻓﻌﻼ ﻏﺎﺍﺍﻟﻴﺔ.
انا ودي اشترك شلون طريقة الأشتراك وهل فيه 2 ميقا ويعني هل الاشتراك ما يحتاج وايرات ومدري شنو نفس فاستلكو وهالشركات
اخ q8ping
ممكن تسوي سبيد تست لسيرفرات اوربية وأمريكية … عشان نشوف البنق ينفع للقيمز ولا لأ
ان شاء الله الليله اسوي وابلغك
سيرفر لندن جربت البنق ٣٠٠
عندي بالـ DSL البنق 274 لسيرفر لندن hosted by traceFM
عدته مرة ثانية طلع 129
وعدته على سيرفر لندن الثاني اللي hosted by netcetera طلع 130
سعر مبالغ جدا في زمن الانترنت صار برخص لتراب الحبايب عبالهم حقل برقان ابيتنا!
شغل عدل
بس السعر وايد غالي
بس صورة الهندي الي لابس نظاره شمسيه ثاني واحد على اليسار وايد واثق من نفسه 🙂
شكرا علي الموضوع 🙂
الداولنود عندك بس 1.5 !!! انا اشتراكي مدى وسرعة الداونلود عندي توصل 1.2 باغلب المواقع .. ومع الرابيد شير توصل 1.1 ميجا .
اوله تقريبا 900 دينار
صدقني اختيارك كان غير موفق حتى لو كانت السرعه عالية وبنيتك التحتية قديمة ماتدفع هالمبلغ الخيالي لشركة ما يندرى شنو اهي لو مشترك بمدى جان احسن
شوف انا مجرب كل الشركات الا مدى وهذي والحين ثبت عكواليتي نت اشتراكي 8 ميجا ومن بعد 12 بليل لي تقريبا 12 الظهر 48 ميجا ومرات توصل السرعة عندي 82 ميجا بالثانية تدري بجم ؟!؟!؟ والله ب 300 دينار وانت 3 اضعاف سعر كواليتي على ماميش
صدقني احسن من الي انت مشترك معاهم … سرعة كواليتي خيالية لو اقدر احطلك صور جان حطيت ال 1 جيجا عندي تنزل ب 3 دقايق ومقزرها افلام 3D وماكو مسلسل او فلم اجنبي الا ومنزله بجودة 1080p ودايما امسك هوست بالالعاب
قولي وين اقدر ادزلك صور وانا اوريك صدقني السعر مايسوى 900 دينار على شنو (o_O)
يعطيك العافيه على التقرير الحلو
انا عانيت من المشكله عندي خط البيت حده ميقا ونص.. حطيت 2 ميقامن شركة فاست تلكو قعد يفصل عندي المشكله من البنيه التحتيه من سنة جدي المفروض يايعدلون الخطوط او يخصصون وزارة المواصلات ويفكونه
8 ميقا ب390 معقول اذا ثابت
بس بغيت اسال يتعاماون بالاقصاد؟
انا مشترك بشركة speednet الامريكيه عبر القمر الصناعي والسرعه ١٠٠ ميقا بالثانيه ولكن الاشتراك غالي جداً ب ٤٣٠٠ دينار سنوياً ولكن افضل سرعه لحد الان هو ٤ ميقا اذا كان البيج نازل واما اذا مرتفع فعليك ب ٨ ميقا
كلنا نحبك يابونظارة
ابونظارة شكله يقدر ينزل لك السعر
هذي الشركة أمام أمرين مستقبلا والله أعلم
خصوصا بعد نزول خدمة LTE من فيفا وزين خلال الست شهور القادمة بإذن الله
إما تنزل أسعارها
أو تسكر
الله يعينكم يا أهل الكويت أحنا بالامارات
30Mbps بــ50 دينار وبدون أي قيود وتحميل مفتوح
لو نفرض معاشي 1000 دينار هل يعقل اقط نصه على نت…!!!
وين ايام الحمله ؟؟!! الي للاسف استخدموها لمصالح شخصيه..!!!
ماشاء علي كثر الشركات اسعارنه غاليه الي يقولي كواليتي ٣٠٠ دينار مستانس ياخي بايقينك ١٦ مره بهالسعر فمابالك شركه جديده تبي تنافس وسعارها اسعار ذهب بالخارج سرعات جنونيه بسعار رمزيه
الحل اعديل البنيه التحتيه للبيوت القديمه زائد انترنت من الوزاره دايركت بدون وسيط تنفيه من هالشركات وتقول الاسعار بمتناول الجميع ومنسابه
وجهة نظر :
انترنت لن يكون ثابت لأنه واي ماكس
سعر غالي
اما الموضوع ممتاز يا محمد
تحياتي
وايرلس ن مو وايماكس
طبعا كالعادة بداية الشركة بتكون مميزة مثل مدى لقلة عدد المشتركين
اول مايتكاثرون تبدي المشاكل والبطء وغيره
دقيت عليهم قالوا نركب لك بعد ٥ اسابيع 🙂
870 دينار شهرياً ؟
هذي هديه مني لك
http://www.speedtest.net/result/1806213192.png
Mimd is wonderful…soo
تقريرك جميل
لو إنك حاط السعر من البدايه ما قرأت التقرير
عالعموم السعر غالي لدرجة الغباااااااء
في شركة جديده للنت قريباً
اسمها موبايلي
سعرها منافس وراح تكسر الأسعار
لا تستعجلون إخواني وزارة المواصلات راح تكثر شركات النت وإن شاءالله اللي اكل فلوسنا بخسر وكل ما كثرو من صالحنا هالشركات الحراميه
انا اايد كلام الاخ iAbdulaziz كلامه ميه ميه وانا كانت عندى نفس المشكله
كان الحد الاقصى لاشتراكي 2انبي وبدلت الوايرات اللي من البوكس الخارجي الى داخل البيت وحطيت
cat-6 وبعدها النت قام يتحمل 10 انبي
بصراحه اشتراكك مكلف جدا ولا يسوى هذا السعر انصحك بدل وايراتك واشترك عن طريق الكيبل اوفر لك واسرع واضمن
السلام عليكم ..
اي احد فيكم مشترك بهالشركه ويلعب قيمز فيها .. لانه وحده استفسر عن البنق ينفع ولا لا
ارجوا الرد باسرع وقت ممكن
اسلام عليكم شباب حبيت استفسر انا من سكان ام الهيمان
ابي شركة نت حق القيم شنو تنصحوني للحين احنا 20 واحد نبي نشترك.. وهل في طريقه اروح الوزاره نطلب فايبر ولا صعبه اذا يبوت اكثر من شخص عادي انيب المنطقه كلها لانه 70% من المنطقه يلعبون قيم
السرعه صعب تحددها لانها تحتمد على اكثر من عامل حسب معرفتي نوع السيرفر اللي تحمل منه وعدد المحملين من السسيرفر في نفس الفترة الزمنيه وعدد اللي يستخدمون الراوتر ، علاوة على ذلك السرعه بالاسلاك اقوى من الوايرلس واضبط لالعاب الاون لاين ،
بالنسبه للهالشركة ما اعرف عنها شي ، وياليت تفيدني هل تغيرة السرعه مع الوقت او تغيرت السرعه مع زيادة عدد المستخدمين و هل واجهتك مشاكل مع تغيرات الطقس مثلا ؟
والله يعطيك العافيه على الجهود الطيبة
شركة فاشلة انا اشتركت ب 10 ام بي ويومياً يفصل عندي مايقل عن 20 مره وكلمت الدعم الفني وطلع لي المهندس وحل المشكلة بس لمدة اسبوع ورجع يفصل. وكنسلت اشتراكي هذا غير ان اسعارهم ناااار وعلي الفاضي. واشترك بكيمز 20 ام بي ب 350 دينار. و بويمد 19. ام بي ب500